વ્હાલા વાચક મિત્રો, આપને એ જણાવવું છે કે તા. ૭-૯-૨૦૨૫, ભાદરવા સુદ ૧૫ (પૂનમ), રવિવારના રોજ ખગ્રાસ ચંદ્રગ્રહણ થવાનું છે. અને આજના આ લેખમાં આપણે આ ગ્રહણની તેમજ ગ્રહણને પાળવાના સમય અને નિયમો વિષેની સંપૂર્ણ માહિતી મેળવવાના છીએ. તો આ લેખને અંત સુધી વાંચજો.
સૌથી પહેલા એ જણાવી દઈએ કે આ ગ્રહણ ગુજરાત સહિત સમગ્ર ભારતમાં દેખાશે. એટલા માટે ભારતમાં ધાર્મિક દૃષ્ટિએ આ ગ્રહણ પાળવાનું રહેશે.
હવે આપણે આ ચંદ્ર ગ્રહણના સમયની માહિતી મેળવી લઈએ. આ ગ્રહણ ૭ સપ્ટેમ્બર રવિવારની રાત્રીએ થશે.
ગ્રહણ સ્પર્શનો સમય : તા. ૭ સપ્ટેમ્બર ૨૦૨૫, રવિવારે, રાત્રે ૯ વાગીને ૫૭ મિનિટથી છે.
ગ્રહણ મધ્યનો સમય : તા. ૭ સપ્ટેમ્બર ૨૦૨૫, રવિવારે, રાત્રે ૧૧ વાગીને ૪૧ મિનિટનો છે.
ગ્રહણ મોક્ષ (મુક્તિ) નો સમય : તા. ૮ સપ્ટેમ્બર ૨૦૨૫, મધ્યરાત્રિએ ૧ વાગીને ૨૭ મિનિટનો છે. એટલે કે તા. ૮ સપ્ટેમ્બરના પ્રારંભે રાત્રિના ૧ વાગીને ૨૭ મિનિટે આ ગ્રહણ પૂર્ણ થઈ જશે.
આ ચંદ્ર ગ્રહણનો પર્વકાળ : ૩ કલાક ૩૦ મિનિટનો રહેશે.
આ ગ્રહણ ભારત, એશિયા, ઓસ્ટ્રેલિયા, યુરોપ અને આફ્રિકામાં દેખાશે, તો આ ગ્રહણ જે દેશમાં જ્યાં જે પ્રમાણે ગ્રહણ દેખાય ત્યાં ત્યાંના સમય પ્રમાણે પાળવાનું રહેશે.
હવે આ ચંદ્ર ગ્રહણના વેધના સમયની વાત કરીએ તો તે તા. ૭ સપ્ટેમ્બર ૨૦૨૫, રવિવારની બપોરે ૧૨ વાગીને ૫૭ મિનિટથી શરુ થશે. તો આપણે રવિવારે બપોરે ૧૨ વાગીને ૫૭ મિનિટથી ગ્રહણનો વેધ પાળવાનો રહેશે. જણાવી દઈએ કે વૃદ્ધો, બાળકો, અશક્તો તથા સગર્ભા સ્ત્રીઓએ ગ્રહણસ્પર્શ થયાના ૨:૩૦ કલાક પહેલાં શાસ્ત્રીય રીતે ગ્રહણવેધનું પાલન કરવું જોઈએ.
ગ્રહણના વેધ દરમ્યાન સૌ કોઈ માટે ખાવા-પીવાનો નિષેધ છે, આ સમયમાં ફક્ત પાણી પી શકાય છે. અને ગ્રહણ દરમ્યાન પાણી પીવાનો પણ નિષેધ છે. એટલે ગ્રહણ શરુ થાય પછી પાણી પણ પીવું નહીં.
ગ્રહણ દરમ્યાન એક સ્થળે બેસીને ભજન-સ્મરણ કરવાનું શાસ્ત્રોક્ત વિધાન છે. ગ્રહણ દરમ્યાન સુતરાઉ વસ્ત્રોને સ્પર્શ કરવાનો નિષેધ છે. ગ્રહણ-મોક્ષ બાદ પહેરેલાં વસ્ત્રો સહિત સ્નાન કરીને દાન કરવાનું શાસ્ત્રનું વિધાન છે.
આ ગ્રહણ દરમ્યાન દરેકે ધ્યાનમાં રાખવાની બાબતો આ પ્રમાણે છે :
૧. તા. ૦૭-૦૯-૨૦૨૫, રવિવારની બપોરે ૧૨ વાગીને ૫૭ મિનિટથી ગ્રહણનો વેધ બેસે છે તેથી તે પછી જમી શકાય નહીં, ફક્ત પાણી પી શકાય.
૨. બાળકો, વૃદ્ધો, અશક્તો, સગર્ભા સ્ત્રીઓ અને બીમાર માટે તા. ૦૭-૦૯-૨૦૨૫, રવિવારે રાત્રે ૮ વાગીને ૧૫ મિનિટથી ગ્રહણનો વેધ બેસે છે. તો તેઓએ ત્યારબાદ જમવું નહીં.
૩. ગ્રહણના સમયે એટલે કે રવિવારે રાત્રે ૯ વાગીને ૫૭ મિનિટથી સોમવારની વહેલી સવારે ૧ વાગીને ૨૭ મિનિટ સુધી ઘરમાં ઊન, કંતાન, રેકઝીન કે પ્લાસ્ટીકનાં આસનોને અડવામાં બાધ નથી. આ ચાર પ્રકારના વસ્ત્ર સિવાયના અન્ય વસ્ત્રનો ગ્રહણ દરમ્યાન સ્પર્શ થાય તો ગ્રહણ બાદ તેને ધોવા પડે.
૪. ગ્રહણના વેધ દરમ્યાન ઘર મંદિરમાં ભગવાનના આરતી, થાળ વગેરે થઈ શકે છે.
૫. વેધ દરમ્યાન ભગવાનને ધરાવેલ થાળની પ્રસાદી આપણે લઈ શકાય નહીં, માટે તે થાળ ગાયને ખવડાવવો.
૬. તમે રાંધેલ તમામ ખોરાક ગ્રહણ સ્પર્શ પહેલાં કાઢી નાખવો.
૭. ગ્રહણના સમયે પોતાના ઘરે સમૂહમાં ભજન તેમજ ધાર્મિક પુસ્તકોનું વાંચન કરવું, પરંતુ આ સમયે સૂવું નહીં, આ સમયે અવશ્ય જાગરણ કરવું, આ સમયે અન્ય કામકાજ પણ ન કરવાં.
૮. ગ્રહણ પૂર્ણ થયા બાદ એટલે કે સોમવારે વહેલી સવારે ૧ વાગીને ૨૭ મિનિટ પછી સવસ્ત્ર એટલે કે પહેરેલાં વસ્ત્ર સહિત સ્નાન કરી ભોજન કરી શકાય.
૯. ગ્રહણ પૂર્ણ થયા બાદ યથાશક્તિ દાન આપવું.
નોંધ : ગ્રહણના સ્પર્શ અને મોક્ષના ઉપરોક્ત સમયો અમદાવાદ સ્ટાન્ડર્ડ ટાઈમ મુજબ દર્શાવેલા છે. માટે સ્થાનિક પંચાંગમાંથી પોતાના શહેરમાં ગ્રહણ દેખાવાની માહિતી મેળવીને તેનું પાલન કરવું. તેમજ ઉપછાયા મોક્ષ તા. ૮-૯-૨૦૨૫ની વહેલી સવારે ૨ વાગીને ૨૫ મિનિટે છે. કેટલીક ધાર્મિક પરંપરાઓ મુજબ ઉપછાયા દરમ્યાન પણ ગ્રહણના નિયમોનું પાલન કરવાનું હોય છે. તો તમે એ પ્રમાણે નિર્ણય લઈ તેનું પાલન પણ કરી શકો છો.
આ લેખને લાઈક અને શેર જરૂર કરજો જેથી વધુમાં વધુ લોકો સુધી ગ્રહણની આ માહિતી પહોંચી શકે.
