જય શ્રીકૃષ્ણ મિત્રો. આજના આ લેખમાં આપણે આસો માસના શુક્લ પક્ષમાં આવતી એકાદશીનો મહિમા જાણવાના છીએ. અને આ એકાદશી કરવાથી કેવું ઉત્તમ ફળ મળે છે એ જાણવાના છીએ. તો આ લેખને અંત સુધી વાંચવા વિનંતી છે. વર્ષ 2025 ના આસો માસના શુક્લ પક્ષની એકાદશી તારીખ 3 ઓક્ટોબર 2025 ને શુક્રવારના રોજ છે. આ એકાદશીનું નામ પાપાંકુશા એકાદશી છે. આ એકાદશીને પાશાંકુશા એકાદશી તરીકે પણ ઓળખવામાં આવે છે. આવો વધુ સમય ન બગાડતા પાપાંકુશા એકાદશીના મહિમા વિશે જાણીએ.
યુધિષ્ઠિર અને શ્રીકૃષ્ણ વચ્ચે સંવાદ ચાલી રહ્યો હતો. યુધિષ્ઠિરે પૂછ્યું — મધુસૂદન! કૃપા કરીને એ જણાવશો કે આસોના શુક્લપક્ષમાં કયા નામની એકાદશી હોય છે?
ભગવાન શ્રીકૃષ્ણ બોલ્યા — રાજન! આસોના શુક્લપક્ષમાં જે એકાદશી હોય છે, તે ‘પાપાંકુશા’ના નામથી જાણીતી છે. તે સર્વ પાપોને હરનારી અને ઉત્તમ છે. તે દિવસે સંપૂર્ણ મનોરથની પ્રાપ્તિને માટે મનુષ્યોએ સ્વર્ગ અને મોક્ષ પ્રદાન કરનારા પદ્મનાભસંજ્ઞક મુજ વાસુદેવનું પૂજન કરવું જોઈએ. જિતેન્દ્રિય મુનિ લાંબા સમય સુધી કઠોર તપસ્યા કરીને જે ફળ મેળવે છે, તે આ એકાદશીના દિવસે ભગવાન ગરુડધ્વજને પ્રણામ કરવાથી જ મળી જાય છે.
પૃથ્વી પર જેટલાં તીર્થ અને દેવાલય છે, તે બધાંના સેવનનું ફળ ભગવાન વિષ્ણુના નામકીર્તનમાત્રથી મનુષ્ય મેળવી લે છે. જેઓ શાઙર્ગંધનુષ ધારણ કરનારા સર્વવ્યાપક ભગવાન જનાર્દનને શરણે જાય છે, તેમને કદી યમલોકની યાતના ભોગવવી પડતી નથી. જો બીજા કામના નિમિત્તે પણ મનુષ્ય એકમાત્ર એકાદશીનો ઉપવાસ કરી લે તો તેને કદી યમ-યાતના નથી પ્રાપ્ત થતી.
જે પુરુષ વિષ્ણુભક્ત થઈને ભગવાન શિવની નિંદા કરે છે, તે ભગવાન વિષ્ણુના લોકમાં સ્થાન નથી પામતો; તેને નક્કી જ નરકમાં પડવું પડે છે. આ રીતે જો કોઈ શૈવ કે પાશુપત થઈને ભગવાન વિષ્ણુની નિંદા કરે તો તેને ઘોર રૌરવ નરકમાં નાખીને ત્યાં સુધી પકવવામાં આવે છે, જ્યાં સુધી કે ચૌદ ઈન્દ્રોનું આયુષ્ય પૂરું નથી થઈ જતું. આ એકાદશી સ્વર્ગ અને મોક્ષ પ્રદાન કરનારી, શરીરને નીરોગ બનાવનારી તથા સુંદર સ્ત્રી, ધન તેમજ મિત્ર આપનારી છે.
રાજન્! એકાદશીને દિવસે ઉપવાસ અને રાત્રે જાગરણ કરવાથી અનાયાસ જ વિષ્ણુધામની પ્રાપ્તિ થઈ જાય છે. રાજેન્દ્ર! તે પુરુષ માતૃ-પક્ષની દસ, પિતાના પક્ષની દસ તથા સ્ત્રીના પક્ષની પણ દસ પેઢીઓનો ઉદ્ધાર કરી દે છે. એકાદશી વ્રત કરનારા મનુષ્ય દિવ્યરૂપધારી, ચતુર્ભુજ, ગરુડની ધ્વજાથી યુક્ત, હારથી સુશોભિત અને પીતાંબરધારી થઈ ભગવાન વિષ્ણુના ધામમાં જાય છે.
આસોના શુક્લપક્ષમાં પાપાંકુશાનું વ્રત કરવામાત્રથી માનવ બધાં પાપોથી મુક્ત થઈ શ્રીહરિના લોકમાં જાય છે. જે પુરુષ સોનું, તલ, ભૂમિ, ગાય, અન્ન, જળ, જોડા અને છત્રીનું દાન કરે છે, તે કદી યમરાજને જોતો નથી. નૃપશ્રેષ્ઠ! દરિદ્ર પુરુષને માટે પણ જરૂરી છે કે તે યથાશક્તિ સ્નાન-દાન વગેરે ક્રિયા કરીને પોતાના દરેક દિવસને સફળ બનાવે. જેઓ હોમ, સ્નાન, જપ, ધ્યાન અને યજ્ઞ વગેરે પુણ્યકર્મ કરનારા છે, તેમને ભયંકર યમયાતના જોવી પડતી નથી.
લોકોમાં જે માનવ દીર્ઘાયુ, ધનાઢ્ય, કુલીન અને નીરોગી જોવામાં આવે છે છે, તેઓ પહેલાંના પુણ્યાત્મા છે. પુણ્યકર્તા પુરુષ આવા જ જોવામાં આવે છે. આ વિષયમાં વધુ કહેવાથી શું લાભ, મનુષ્ય પાપથી દુર્ગતિમાં પડે છે અને ધર્મથી સ્વર્ગમાં જાય છે. રાજન્! તમે મને જે કંઈ પૂછ્યું હતું, તેના મુજબ પાપાંકુશાનું માહાત્મ્ય મેં વર્ણન કર્યું.
મિત્રો, અહીં પાપાંકુશા એકાદશીનો મહિમા સમાપ્ત થયો. આ લેખને લાઈક અને શેર જરૂર કરજો, જેથી વધુમાં વધુ લોકો સુધી આ માહિતી પહોંચી શકે.
