પેઢાંમાં દુઃખાવો થાય છે? મોમાં છાલા પડી ગયા છે? જીભ પર ચાંદી થઈ છે? નાકમાંથી લોહી નીકળે છે? તો આ ઘરગથ્થુ ઉપચાર કરશે મદદ
નમસ્કાર વાચક મિત્રો, આપ સૌનું આરોગ્ય સંબંધિત લેખમાં ફરી વખત સ્વાગત છે. મિત્રો, જો તમારામાંથી કોઈને અથવા તમારા ઘર-પરિવારમાં અથવા આડોશ-પાડોશમાં અથવા મિત્રમંડળમાં કોઈને દાંત, કાન અને નાકને લગતી કોઈપણ તકલીફ હોય તો આ લેખ દરેક માટે ખુબ ઉપયોગી રહેશે. આજના આ લેખમાં અમે દાંત, કાન અને નાકની તકલીફો – રોગો માટે કેટલાક ઘરગથ્થુ ઉપચાર લઈને આવ્યા છે, જે ખુબ અસરદાર છે. તો આ લેખ અંત સુધી વાંચજો અને લાઈક અને શેર પણ કરજો જેથી વધુમાં વધુ લોકો આ ઘરગથ્થુ ઉપચારનો લાભ લઈ શકે. તો આવો વધુ સમય ન બગાડતા ઘરગથ્થુ ઉપચારની શરૂઆત કરીએ.
(ઘરગથ્થુ ઉપચાર ભાગ – 2)
[અ] દાંતની તકલીફો અને ઉપચાર :
(૧) સવારના પહોરમાં કાળા તલ ખૂબ ચાવીને ખાઈને ઉપર થોડું પાણી પીવાથી દાંત મજબૂત બને છે.
(ર) તલનું તેલ હથેળીમાં લઈ આંગળી વડે પેઢા પર ઘસવાથી હાલતા દાંત મજબૂત બને છે.
(૩) હિંગ અથવા અક્કલગરો હાલતા દાંતમાં ભરવાથી દુ:ખાવો મટે છે અને દાંત મજબૂત બને છે.
(૪) વડની વડવાઈનું દાતણ કરવાથી હાલતા દાંત મજબૂત બને છે.
(૫) હિંગને પાણીમાં ઉકાળી કોગળા કરવાથી દાંતનો દુ:ખાવો મટે છે.
(૬) લીંબુનો રસ દાંતનાં પેઢાં પર મસળવાથી દાંતમાંથી નીકળતું લોહી બંધ થાય છે.
(૭) કૉફીનો ઉકાળો કરી તેના કોગળા કરવાથી દાંતનો સડો અને દાંતનો દુ:ખાવો મટે છે.
(૮) દાંતનું પેઢું સૂઝી ગયું હોય તો મીઠાના ગાંગડાથી તેને ફોડી, તેના પર ફુલાવેલી ફટકડીનો પાવડર લગાડવાથી મટે છે.
(૯) ફુલાવેલી ફટકડીનો પાવડર દાંતનાં પેઢાં પર દબાવવાથી દાંતમાંથી નીકળતું લોહી બંધ થાય છે.
(૧૦) દાંતમાં સડો થાય તો મીઠાના પાણીના કોગળા વારંવાર કરવાથી દુ:ખાવો મટે છે.
(૧૧) દાંતનું પેઢું સૂઝી ગયું હોય તો નિયમિત મીઠું અને હળદરનો પાવડર મેળવી પેઢાં પર ઘસવાથી મટે છે.
(૧૨) લીંબુનો રસ, મીઠું અને તેલ મેળવી દાંતે ઘસવાથી દાંતનો દુ:ખાવો, દાંતની પીળાશ અને દાંતમાંથી નીકળતું લોહી બંધ થાય છે.
(૧૩) સરસિયાના તેલ સાથે મીઠું મેળવીને દાંત ઘસવાથી પાયોરિયા મટે છે.
(૧૪) સફરજનનો રસ ખાવાના સોડા સાથે મેળવી દાંતે ઘસવાથી દાંતમાંથી નીકળતું લોહી બંધ થાય છે અને દાંતની છારી મટે છે.
(૧૫) તલના તેલનો કોગળો મોઢામાં દસ-પંદર મિનિટ ભરી રાખવાથી પાયોરિયા મટે છે અને દાંત મજબૂત બને છે.
(૧૬) પાકાં ટામેટાંનો રસ ૫૦ ગ્રામ જેટલો દિવસમાં ત્રણવાર પીવાથી દાંતમાંથી નીકળતું લોહી બંધ થાય છે.
(૧૭) તુલસીનાં પાન ચાવવાથી અને તુલસીનાં પાનના કોગળા કરવાથી દાંત અને પેઢાં મજબૂત બને છે અને કાંદો (ડુંગળી) ખાવાથી દાંત સફેદ દૂધ જેવા થાય છે.
(૧૮) પોલી થયેલી અને કોહવાઈ ગયેલી દાઢમાં તથા દાંતના પોલાણમાં લવિંગ અને કપૂર અથવા તજ અને હિંગ વાટી ભેગું કરી ભરી દેવાથી આરામ થાય છે.
(૧૯) દાંત પીળા પડી ગયા હોય તો પીસેલું મીઠું અને ખાવાનો સોડા મેળવીને દાંતે ઘસવાથી પીળાશ મટે છે.
(૨૦) રોજ સવારે મેથી પાણીમાં પલાળીને નરણા કોઠે ચાવીને ખાવાથી પાયોરિયા મટે છે.
[બ] કાનની તકલીફો અને માવજત :
(૧) કાન દુ:ખતો હોય તો મૂળાનાં પાનનો રસ સહેજ ગરમ કરી કાનમાં નાખવાથી દુ:ખાવો અને ચસકા મટે છે.
(૨) મધનાં ટીપાં કાનમાં નાખવાથી કાનનો દુ:ખાવો અને રસી મટે છે.
(૩) તેલમાં લસણની કળી કકડાવીને, તે તેલનાં ટીપાં કાનમાં નાખવાથી કાનના ચસકા અને કાનની રસી મટે છે.
(૪) આદુંનો રસ સહેજ ગરમ કરીને કાનમાં નાખવાથી ચસકા મટે છે.
(૫) સફેદ કાંદાના રસનાં ટીપાં રોજ બે વખત કાનમાં નાખવાથી બહેરાશ મટે છે.
(૬) કાંદાનો રસ અને મધ મેળવી તેનાં ટીપાં નાખવાથી કાનના ચસકા મટે છે. પરુ થયું હોય તો તે પણ મટે છે.
(૭) નાગરવેલનાં પાનનો રસ ગરમ કરીને તેનાં ટીપાં નાખવાથી કાનનો ચસકો અને દુ:ખાવો મટે છે.
(૮) કાનમાં કોઈ જીવજંતુ પેસી ગયું હોય તો સરસિયાના તેલનાં ટીપાં નાખવાથી તે મટી જાય છે.
(૯) તેલમાં થોડી રાઈ વાટીને સોજા પર લેપ કરવાથી કાનનો સોજો મટે છે.
(૧૦) કાનમાં બગાઈ, કાનખજૂરો જેવાં જીવજંતુ પેસી ગયાં હોય તો મધ તથા તેલ ભેગા કરી કાનમાં ટીપાં નાખવાથી ફાયદો થાય છે.
(૧૧) ફુલાવેલી ફટકડી અને હળદર ભેગી કરી કાનમાં નાખવાથી કાન પાક્યો હોય અને રસી નીકળતી હોય તો તે મટે છે.
(૧૨) સવારના પેશાબનાં તાજાં ત્રણ-ચાર ટીપાં કાનમાં નાખવાથી બહેરાશ મટે છે.
(૧૩) તુલસીના રસનાં ટીપાં કાનમાં નાખવાથી કાનનો દુ:ખાવો અને ચસકા મટે છે અને પરુ થયું હોય તો તે પણ મટે છે.
(૧૪) વરિયાળી અધકચરી વાટીને પાણીમાં ખૂબ ઉકાળી, તે પાણીની વરાળ દુ:ખતા કાન પર લેવાથી કાનની બહેરાશ, કાનની શૂળ અને કાનમાં થતો અવાજ મટે છે.
(૧૫) તલના તેલમાં હિંગ નાખી ઉકાળી તે તેલનાં ટીપાં કાનમાં નાખવાથી દુ:ખાવો મટે છે.
[ક] નાકની તકલીફો અને માવજત :
(૧) ઘઉંના લોટમાં સાકર અને દૂધ મેળવીને પીવાથી નાકમાંથી લોહી નીકળતું બંધ થાય છે.
(૨) નસકોરી ફૂટે ત્યારે તાળવા ઉપર ઠંડા પાણીની ધાર પાડવી તેમજ નાકમાં ઠંડા પાણીની છાલક મારવાથી લોહી બંધ થાય છે.
(૩) નસકોરી ફૂટે ત્યારે ફટકડીનું ચૂર્ણ સૂંઘાડવું અને તેનું પાણી નાકમાં નાખવાથી લોહી તરત બંધ થઈ જાય છે.
(૪) મરી અને દહીંને જૂના ગોળમાં મેળવીને પીવાથી નાકમાંથી લોહી નીકળતું બંધ થાય છે.
(૫) નસકોરી ફૂટે ત્યારે બરફનો ટૂકડો માથે, કપાળે અને ગરદન પર ઘસવાથી લોહી બંધ થાય છે.
(૬) નસકોરી ફુટે તો શેરડીનાં ટીપાં, કાંદાના રસનાં ટીપાં, ગાયના ઘીનાં ટીપાં, દૂધનાં ટીપાં, ખાંડના પાણીનાં ટીપાં, દ્રાક્ષનાં પાણીનાં ટીપાં, ઠંડા પાણીનાં ટીપાં આ બધાંમાંથી ગમે તે એક વસ્તુનાં ટીપાંથી લોહી પડતું બંધ થઈ જાય છે.
(૭) દૂધીનો રસ, મધ અને સાકર સાથે પીવાથી નાકમાંથી કે ગળામાંથી પડતું લોહી બંધ થાય છે.
(૮) મરી અથવા અજમો નાખીને ગરમ કરેલું તેલ નાકમાં નાખવાથી કે સૂંઘવાથી કે નાકે ચોળવાથી નાક બંધ થઈ ગયું હોય તો ખૂલે છે તથા લીંબુનો રસ કાઢી નાકમાં પીચકારી વડે નાખવાથી પણ નસકોરીનું દર્દ કાયમ માટે નાબૂદ થાય છે.
(૯) આમળાંનાં ચૂર્ણને દૂધમાં કાલવી રાત્રે સૂતી વખતે મગજના ભાગ પર લગાડવાથી વારંવાર ફૂટતી નસકોરી બંધ થાય છે.
(૧૦) અરડૂસીનાં પાનના રસનાં ૩ થી ૪ ટીપાં નાકમાં નાખવાથી નસકોરી બંધ થાય છે તથા અરડૂસીનાં પાનનો રસ પીવાથી નાક કે મોં વાટે પડતું લોહી બંધ થાય છે.
(૧૧) લીંબુનો રસ કાઢી નાકમાં પીચકારી વડે નાખવાથી નસકોરીનું દર્દ કાયમ માટે નાબૂદ થાય છે.
(૧૨) કેરીની ગોટલીનું ચૂર્ણ નાક વડે સૂંઘવાથી નાકમાંથી નીકળતું લોહી બંધ થાય છે.
નસકોરી ફૂટે ત્યારે તાત્કાલિક ઉપાય :
વ્યક્તિને ખુલ્લી બારી પાસે ટટ્ટાર બેસાડવો. તેના ગળા અને છાતીની આગળનાં ચુસ્ત કપડાં ઢીલાં કરવાં. તેનું માથું ગરદનની પાછળ તરફ ઢળતું રાખવું.
તેની બોચી અને ગરદન ઉપર ઠંડા પાણીનાં પોતાં મૂકવાં. તેના માથા પર ઠંડુ પાણી છાંટવું અગર બરફ ઘસવો.
નાકમાં રૂનું પૂમડું દબાવવું. નાકના મૂળ પર પાણીમાં પલાળેલું કપડું કે ભીની કરેલી માટી મૂકવી.
નોંધ : અહીં આપેલા ઘરગથ્થુ ઉપચાર વિવિધ આયુર્વેદિક, હોમિયોપેથિક પુસ્તકો અને અન્ય માધ્યમોમાંથી લેવામાં આવ્યા છે. દરેકને પોતાની પ્રકૃતિ – તાસીર મુજબ ઉપચારોથી ફાયદો થાય છે તેની ખાસ નોંધ લેવી. કોઈ ચિકિત્સક, વૈદ્ય પાસેથી પોતાની પ્રકૃતિ તથા ઔષધયોગ સંબંધી જાણકારી મેળવી તેમની સલાહ લેવા વિનંતી.
વ્હાલા વાચક મિત્રો, આ લેખને લાઈક કરી તમારા કુટુંબના સભ્યો, મિત્રો અને સાથી કર્મચારીઓ સાથે શેર પણ કરજો જેથી વધુમાં વધુ લોકો આ ઘરગથ્થુ ઉપચારનો લાભ લઈ શકે. અમે તમારા માટે આવા ઉપયોગી અને માહિતીસભર લેખ લાવતા રહીશું. અમારી સાથે જોડાઈ રહેવા બદલ આપનો ખુબ ખુબ આભાર.
